Tallimanngorneq Januarip ulluisa 22-iat ukioq 2010

1. Ullaaq itersaatiga itersaanngilersoq pasitsallunga, aarimmi itersaasimasoq qamissimagakku taavaana atuartiitiga inortuilersoq! Qujanartumik makikkama pikkoringaarluni ullaakkorsiornerami, atisalersorluni pinngussallu nassatassani piareereerlugit. Taamaallaalli una qaavatigut atisalersorami inortuigani atuarfimmut apuuppoq. Puuh..
2. Meeqqerivimmukarluta nukarlequssuara pisuttarami siulliuniaavilluni. Qaangertilersoranilu aqqustissannik assersorniapallattarpaanga nammineq siulliuniassagami. Takulerpara kinaassuseeraa sakkortunerulersimasoq, tassa unammisoq anguagaqaraangami sukataartartoq. Taamaattoq takulluariarakku siunissamut ernumassuteqarnanga misigaanga. Taiimi pikkorik!
3. Asulumi meeqqerivimmi atuartunngornissaminut piareersimanerluni misissortikkami angusarissaaqaaluni meeqqerisuisa unnersiuutigaat; ajornaqaarooq silappaarinnermik pikkorinnermillu nammineq tupigusullutik. IGGU! Anaanani assorsuaq tulluusimaartippaa, arlaatigut aamma uannut takussutaagami ulluinnarni ajunngitsumik perorsaasimagama taamak angusarissaartigisoq.
4. Ullormut malugaara qiimanerullunga eqqarsaatikkalu piffissami kingullermi oqimaannerusimasut nassuerutigisinnaalerlugu. Aamma nassuerutigaara pissuserissaarneq ilikkariartornikuusara kinguariaallassimasoq, qujavungali tamanna takusinnaagakku, nalunnginnakkulu qanoq iliorlunga imminut naammagalunga ingerlaqqissinnaallunga, imminut anaartarnanga.
5. Tupinnaqaaq ullumikkut inooriaaseq eqqarsaatigilluaraanni. Ullormut pisimasut tallimat allattortuarpakka. Ullut ilaanni pisimasut nuannersut amerlasangaarmata toqqartuisariaqartarpunga pisimasut suut allattussanerlugit. Ullut allat ilaanni siulliit marlunnguit allariarlugit nalulertarpara pisimasut allat nuannersut suunersut. Taamaakkaluartorli sapinngisara tamaat atorlugu pisimasunik nuannersunik tallimanik nassaartarpunga. Ullumi una allalerakku imminut tupigutsippunga, tassami erniinnannguaq 200-jussaa allangajalerakku.