Sisiamanngorneq Decemberip ulluisa pingajuat ukioq 2009

1. Ullaaq iluavissumik aatsaat arfineq marlunoorama ernikka isumageqqaarlugit suliartorama iluavippoq. Makittunga angajulleq iteriarama atisassai piareeriarlugit, nammininnguaq atisalersoriarluni, taamaasiornerani nukaa itersimalluni anillaarartoq iteqqarnisoq ineunassusia nalissaqanngilaq! Iluatatsikkusullugit qullortitanik kissaakkakkit iluarinnguatsiaqaat.
2. Aallakaatitsinera nammineq ingerlalluartutut nalilerakku iluarusuppunga, nalunagulu ullormut isumaqatigiissuteqareerlunga aqagumut aallakaatitsinissaq ulikkaareerlugu.
3. Ullumi suleqaitsinnit nersualaarneqaratta iluarisimaarlunga malugaara, tamannalu nuannaarutigaara.
4. Ualimut erinarsoqatissaralu atisassatsinnik qinaasigatta nuannivippoq, qujana´vissumillu torraffaarinnik nassaarluta.
5. Ernikka sammisaqattaarakkit, igaffileralunga errortaleralungalu assut imminut iluarisimaarpunga

Pingasunngorneq Decemberip ulluisa aappaat ukioq 2009

1. Anitinnanga atuartuutiga taquassiuukkakku imminut iluarisimaarpunga.
2. Naliginnaasumik ullakkut suliartoraangama pisuinnartarama ullaaq suleqatima aqqusaaraminga iluaqaaq, ingammik sila taamak issittigitillugu.
3. Ullumi sulillunga immiussat pingasut piareereerakkit, soraartinnangalu aqagumut aqaguagumullu isumaqatigiissuteqareerama assut imminut iluarisimaarpunga.
4. Kiisami asuujaarama ernikka aajaarakkit assut tamatta iluatappugut.
5. Ulapingaatsiraluarlunga errorsigama erruivillu immernikuullugu innarsinnaallunga sunaana taamak ilorrisimaarnartigisoq!