Sisamanngorneq Septembarip qulingat ukioq 2009

1. Ullaaq iteriaarneq sungiussimariarakku itersaatiga kingusinnerusukkut sianertussanngortinnikuugaluarlugu asu suli itersaanngitsoq iterpunga, iluataatigingaarlugu kignullialaarsinnaanera.
2. Ullummi suliffinni angusarissaartutut misiginera iluataatigaara.
3. Illoqarfimmi angalaaruttorlunga ikinngutiga qangali takusara naaperiarakku ilagerujuulaarakku ilivitsunnguumisutut misiginera nuannaarutigaara.
4. Aqagumut nuannivimmik pissangaammertaqattaarpunga Torluukkullu toqqaannartumik KNR-TV-koortussaanerput.´
5. Unnugu kammaga erneralu ilagalugit neriartoriarluta filmeriarnissarput qilanaarnaq

Sisamanngorneq Septembarip qulingiluaat ukioq 2009

1. Suleqatigalu aallakaatitassiarput suliarigatsigu nuannivippoq, piareersimalluarluta, qujanartumillu tusarnerineqarsimalluta.
2. Aqagumut suliassakka naammassiaariarakkit asuujaarama iluavippoq, ullut kingullit pigaartoorpallaartarlunga (aali makiaartussaallunga) qasuuikkama. Angerlamara sinilaarama iluavippoq.
3. Ernera angajulleq aagakku illoqarfimmi angalaarluta nukkaminut maqaasileqqalluni aliasulermat pikkoringaarlunga, inuit qanoq eqqarsarnissaat soqutigiunnaarlugu, sumut tamaanga aqqusinermut ingiinnarluta aliasukkunnaarnissaata tungaanut tuppallersarujoorakku imminut iluarisimaarpunga. Una nuannaarutigaara inuit qanoq iliuutsinnut eqqarsarnerat uannik aqutsiunnaarsimammat, uangali qanoq iliuuseqarnera salliutissinnaalersimagakku.
4. Ullut arlallit iliarsoruoqqalluta illoqarfimmi nerisarnikuugaluarluta angerlarsimaffigtsinni nerinerput nuannaarutigaara, nerereerlutalu Inumerngup spilleqatigerusukkaanga, spillerneq nuannarinngikkaluarlugu, spilleqatigigakku ernima pisariaqartitaa tunnissinnaagakku aamma taanna nuannaarutigaara.
5. Unnussuaq tamaat kiisami kisimeerujoorama nuannivippoq. Ukiut kingulliit sungiunnikuullugu kisimeerujoortuarneq piffissaq kingulleq uagutsinni inoqartuarnera nuannerarluartoq kisimiilaarnera iluataatigaara, innajaarlungalu