Pingasunngorneq Septemberrip aappaat ukioq 2009

1. Ullaaq iterama ulloq nutaaq iterfigalugu nuanneq. Makillunga ernikka suli sinnguttut, matuat ammarakku ernera nukarleq namminiussutsiminik pissusilersoorartoq inequgivillugu. Itiinnaavilluni ilaanneeriarluni ingerlaannaq takutikkusunneq ajorami, sinittarfinnut allereerlunga anillallunga tusaasimariaraminga appakaatilersunga anartarfiup tungaanut nipaanniasaarluni arpapallattoq takutinnaveersaarluni oqaaseqanngiivilluni. Aatsaat piareerami ilassiorpaanga.
2. Itersaat kinguartittaqattaarnikuugakku kingusinaalaarluta makikkatta atuartuutiga ullaakkut piluusaartartoq nalunaarfigiganni massakkut makinngikkuni atuarfimmut inortuissasoq asu ingerlaannaq qisuariarpoq namminerooq inortuerusunnginnami atuarfimmut.
3. Ullumi ippassaq pikkunartorujussuarmik aalassassimaariarama ullumi tamatuma kingunerisaanik malugaara qasulaarlunga tamannalu akueralugu. Iluaqaaq imminut paarilluarsinnaagama imminullu naalaarniartuarama.
4. Ullumi suliffinni aamma ajunngivimik angusaqarama suleqatikka oqaloqatigilluarlugit angusaqarnarsoreqaara.
5. Unnummut nerereerluta pikkoringaarlunga aperivunga ikioqqullunga neriffikoq iluarsaateqqullugu. SIullermik aperinaga naatsorsuutigiinnarlugu pisimasinnaagaluarlunga, taamaasiortoqanngippallu nipikitsumik isumalorujoorlunga, uuh sunaana pissusipalaaq qimassimallugu paasillugu nuannertigisoq! Tupinnaqaaq iliuutsip annikissusia, aperissalluni "ikiulaarsinnaavinga?", iliuutsillu annikikkaluap eqqarsaatigiinnarlugu ajornanngitsup pissutsimut ilaalersissallugu sunaana taamak ajornarsimatigisoq...