Ataasinngorneq 07. September 2009

1. Ullaaq sila nuanniitsoq silamut sunnertinnanga sialussiutilersoqqissaarlunga ullaaralaaq suliartorama nuanneq eqiiallannaq. Iluariivippara ukiaanera, inuunerup nutaamillusooq aallartinnera.
2. Ullumi uippakajaalaaraluarluta sulqatigalu toqqaannartumik aallakaatitseqatigeeqqaaratta nuannivippoq.
3. Suliffinni aqagumut anguniakkakka angugakkit imminut iluarisimaarpunga.
4. Ulloq naallugu pikkoringaarlunga unneqqarillunga misigissutsikka eqqartoqattaarpakka pisariaqartillugu, imminullu pikkoringalunga pissuserisartakkakka nuannarinngisakka qasoriarama tikeqattaangajakkaluarlugit ingerlaannaq imminut malugalunga unitsittaqattaarakkit.
5. Unnummut nipilersoqatikkalu uagutsinni naapisimaaratta appisimaarnikuunigut eqqartoratsigit iluaallannaqaaq. Nipilersornitta nalaani misigisimasavut oqaloqatigiissutigigatsigit illaqattaarlutalu pigatta iluavippoq.

Sapaat Septemberip arfernat ukioq 2009

1. Ullaaq kingulliaqqikkama iluaq.
2. Ernikka uffartillugit, kukii killorlugit, anitigatalu uagutsinni nereqqaaratta nuanneq. Eqqarsaleraluaram taniinissara eqiagiinnarlugu nerisassatsinnik pisiinnarumaartugut qujavunga uagutsinni neriinnaratta.
3. Ullumi ernera angujulleq killissannik qaangiisoq imminut iluarisimaarpunga ingerlaannaq killilerakku ersarissumik paasitillugu. Piffisaq una kingulleq ernikka qallunaatut oqalunniakujuttaramik, busseruttortugut ernima angjulliup qallunaatut mor-mik taammanga mamaagalugu malugigakku ingerlaannaq piumaffigaara anaanamik taasassagaanga nuannarinnginnakku mor-mik taaneqarlunga. Asulumi oqaatigigakku sorujussunngunnginnami oqaatigigakku tassa paasivaa. Ilumummi meeqqat tigusillaqqik!
4. Ualimut kammataatinnut inoorlaajutilimmut pulaarujooratta nuanneq! Nuunuutaa asanangaartoq uannit tigummineqarluni sinerusaarluni sakissannut innarluni uummatima nalaa akiseralugu, taammaannerata nalaani ernikka silataani aneerlutik kammalaatigalu oqaloqatigeerujoorluta. Kammalaatima ernera akulleq iterami uanga ernikka isersimalersimasut nuannaartorillugit ilaaqattaarai aamma inequnavippoq. Naa nuanneq kammalaatiga taanna ilagalugu, soorlu ilivitsunnguallannarluni, nuannernerpaajullunilu inuttaanut taamak misigisimanera anngukkakku.
5. Ernera nukarleq aqagu meeraqatinilu asiarlutik aallarniartut poortuissullugu uanga assinnik nassatassaanik ujaasillunga nassaarileriallariga Ulloriarlu asserput marluinnaalluta asseq nuannerluinnartoq. Pialuutikka ujaasiffigalugit sinissaanik nassaffaarillunga. Misigissutsikka maluginiaqqissaarpakka maqaasissamaarlugu nalungagu, nukarlequtigigakkulu ungagigaluarluni qanigisani qimallugit aallanngaalersoq ungagigaluarlugu, nalunaguli nuannisassasoq. Taqqama tutippaanga, qilanaarnaq innarfiginissaa, naamalaarnissaa, anersaartornerata tusaanissaa kissalaarneratalu malugunissaa. Igguaraatiga asasara